Претставник од Здружението на лица со церебрална парализа и други попречености – Велес учествува во студиска посета на Долна Австрија, реализирана во рамки на проектот „Трансакт”.
Македонската делегација е составена од претставници на невладини организации кои спроведуваат социјални услуги, заменик-министерот за здравство Јовица Андов, претставник од Министерството за социјална политика, демографија и млади, градоначалниците на општините Градско и Кривогаштани, секретарот на Општина Прилеп, претставник од ЈУ Меѓуопштински центар за социјални работи Прилеп, како и претставник од Заводот за социјални дејности во Р. Македонија.
Во периодот од 20 до 24 април, делегацијата има можност да се запознае со низа успешни проекти и современи модели на социјални и здравствени услуги кои се реализираат на територијата на Долна Австрија. Оваа студиска посета претставува исклучително значајно и корисно искуство, при што учесниците изразуваат искрена благодарност до домаќините за топлиот прием, отвореноста за споделување знаење и подготвеноста за соработка. Ваквите средби не само што овозможуваат размена на искуства, туку и отвораат нови хоризонти и идеи за понатамошен развој.
Посетата е од особено значење за унапредување на капацитетите и знаењата во областа на социјалната и здравствената заштита во Македонија. Преку директно запознавање со добрите практики, иновативните пристапи и интегрираните услуги, се создава реална можност за нивна примена и адаптација во нашиот систем. Учесниците ја нагласија важноста од континуирано подобрување на услугите, со цел обезбедување поквалитетна поддршка за граѓаните, особено за ранливите категории.
Во текот на студиската посета беа реализирани посети на повеќе институции и сервиси, меѓу кои: Црвениот крст во Мистелбах, Психосоцијалниот сервис, како и презентација на услугата „Сестра во заедницата“. Делегацијата го посети и Дневниот центар за стари лица „Клементум“, каде што имаше можност да се запознае со терапија со помош на животни и со проектот „Храна на тркала“. Дополнително, беа посетени Шелтер центар за жени жртви на семејно насилство, Општата болница во Мистелбах како и Младински центри.
Особено значајно е што оваа посета претставува силна основа за интензивирање на соработката помеѓу Македонија и Австрија, како и продлабочување на партнерствата со релевантните институции и организации. Постојат големи можности за понатамошна размена на искуства, заеднички проекти и пренесување на знаење, што ќе придонесе кон развој на поефикасни, достапни и квалитетни услуги.
Учесниците ја истакнаа својата благодарност и задоволство од целокупната организација и реализација на студиската посета, со уверување дека стекнатите искуства ќе бидат значајно искористени во насока на унапредување на здравствените и социјалните услуги во Македонија, како и во градење посилна и поодржлива меѓународна соработка.
