На 25 септември 2026 година, во Хотел „Интернационал“ – Велес, успешно ја реализиравме Информативната сесија посветена на предлог Законот за вработување и професионална рехабилитација на лица со попреченост, во рамките на проектот „Заедно сме посилни 2“, со поддршка од Фондацијата Kvinna till Kvinna.

Во текот на сесијата, говорниците Сузана Трајковска Кочанковска од Фондација Сизигија Скопје и Сузана Попоска од ЈУ Завод за рехабилитација на деца и младинци – Скопје ги презентираа клучните аспекти на предлог законското решение, со посебен осврт на методологијата на законот, предвидените механизми, можностите за вработување и професионална рехабилитација, како и правата и поддршката за лицата со попреченост.

Особено значење имаше присуството и активното учество на претставници од здруженија и граѓански организации од Вардарскиот плански регион, лица со попреченост и родители/старатели, претставници од институции, бизнис-секторот и други релевантни чинители.

Сесијата беше можност за отворена дискусија, размена на искуства и информации, поставување прашања од практично значење и споделување на предизвиците со кои се соочуваат лицата со попреченост при пристапот до пазарот на трудот.

Благодарност до сите учесници, говорници и организации кои со своето присуство и придонес ја збогатија оваа информативна сесија.