Во рамките на третиот ден од студиската посета, реализирана во рамките на проектот „Лицата со попреченост одгледуваат органски лековити билки“, финансиски поддржан од Western Balkans Fund и Европската Унија, беше одржана практична обука во работниот центар на Здружението на лица со церебрална парализа и други попречености – Велес.

Обуката беше насочена кон стекнување практични знаења и вештини за преработка и подготовка на производи од органски лековити и ароматични билки. Учесниците имаа можност да се запознаат со различни техники и постапки за изработка на производи со додадена вредност, при што активно учествуваа во практичниот дел од обуката.

Во текот на обуката беа реализирани практични активности од следните области:

– дестилација на етерично масло од лаванда;

– подготовка на вреќички од лаванда;

– изработка на тинктура од лаванда;

– подготовка на чај од лаванда;

– подготовка на масло од невен;

– изработка на крем за нега од невен;

– подготовка на чај од невен;

– подготовка на чајна мешавина од жалфија, рузмарин и босилек;

– изработка на рачно изработени сапуни.

Посебно внимание беше посветено на практичната работа, со цел учесниците не само да се стекнат со теоретски знаења, туку и самостојно да ги применат научените техники и постапки. На тој начин, обуката придонесе кон развивање на нивните практични вештини и поттикнување на нивната активна вклученост во процесите на преработка и создавање производи од лековити билки.

Обуката успешно ја завршија сите учесници. По завршувањето на обуката, на сите учесници им беа доделени сертификати за успешно завршена обука, со што беше одбележан нивниот ангажман, стекнатото знаење и успешно совладаните практични вештини.

Третиот ден од студиската посета претставуваше значаен чекор во јакнењето на капацитетите на лицата со попреченост и нивното активно учество во создавањето и развојот на производи базирани на органски одгледани лековити и ароматични билки.